(ពោធិ៍សាត់) ៖ មនុស្ស ៣នាក់ (ប្ដី ប្រពន្ធ និងកូនស្រី អាយុ ៥ឆ្នាំ) បានស្លាប់បាត់បង់ជីវិតយ៉ាងអាណោចអាធ័ម នៅនឹងកន្លែងកើតហេតុ ខណៈកូនស្រីម្នាក់ទៀត អាយុ ៣ឆ្នាំ រងរបួសស្រាលដោយសារគ្រោះថ្នាក់ចរាចរណ៍រថយន្ដបុកម៉ូតូ ។
គ្រោះថ្នាក់ចរាចរណ៍ដ៏រន្ធត់នេះ បានកើតឡើង កាលពីវេលាម៉ោង ១៥៖៤៥នាទីរសៀល ថ្ងៃទី៧ ខែមករា ឆ្នាំ២០២៥ នៅលើកំណាត់ផ្លូវក្រួសក្រហមមួយខ្សែ ក្នុងភូមិថ្មី ឃុំត្នោតជុំ ស្រុកក្រគរ ខេត្តពោធិ៍សាត់ ។
សមត្ថកិច្ចមូលដ្ឋាន បានឱ្យដឹងថា គ្រោះថ្នាក់ចរាចរណ៍នេះ កើតឡើងរវាងរថយន្ដ ១គ្រឿង ម៉ាកតូយ៉ូតា VIGO ពណ៌ទឹកប្រាក់ ពាក់ផ្លាកលេខ ពោធិ៍សាត់ 2C -9699 បើកបរដោយឈ្មោះ តាន់ មេសា ភេទប្រុស អាយុ ២៣ឆ្នាំ រស់នៅភូមិប្រមោយ ឃុំប្រមោយ ស្រុកវាលវែង ខេត្តពោធិ៍សាត់ ជាមួយម៉ូតូហុងដា ម៉ាក WAVE ពណ៌ខ្មៅ ពាក់ផ្លាកលេខ ពោធិ៍សាត់ 1N-1400 ក្នុងទិសដៅបញ្ច្រាសគ្នា ។
សមត្ថកិច្ច បានឱ្យដឹងទៀតថា នៅរសៀលនោះ គេឃើញរថយន្ដបង្កគ្រោះថ្នាក់ខាងលើ បើកបរក្នុងល្បឿនលឿន ហុយដីទ្រលោមក្នុងទិសដៅពីត្បូងទៅជើង ។ លុះមកដល់ភ្នំក្បាលសៀម ត្រង់ចំណុចផ្លូវកោង ស្ថិតក្នុងភូមិឃុំខាងលើ ក៏បុកម៉ូតូដែលកំពុងធ្វើដំណើរបញ្ច្រាសទិសគ្នាយ៉ាងពេញទំហឹង ខ្ទាតទាំងមនុស្ស និងម៉ូតូ រណូករណែលពេញថ្នល់ បណ្ដាលឱ្យស្លាប់ ៣នាក់ភ្លាមៗនៅនឹងកន្លែងកើតហេតុតែម្តង និងម្នាក់ទៀតរងរបួសស្រាល ។
ជនរងគ្រោះដែលស្លាប់បាត់បង់ជីវិត រួមមាន៖ ទី១-ឈ្មោះ ឈុំ សុផុន ភេទប្រុស អាយុ ៣១ឆ្នាំ (ជាប្ដី) ទី២-ឈ្មោះ ហេង គឹមឡេង ភេទស្រី អាយុ ២៧ឆ្នាំ (ជាប្រពន្ធ) និងទី៣-ឈ្មោះ ផុន ផអ៊ី ភេទស្រី អាយុ ៥ឆ្នាំ (ជាកូន) ។ ចំណែកកូនស្រីម្នាក់ទៀត អាយុ ៣ឆ្នាំ រងរបួសស្រាល ។ ក្រុមគ្រួសារជនរងគ្រោះ រស់នៅភូមិត្រាំសេះ ឃុំបឹងបត់កណ្ដោល ស្រុកបាកាន ខេត្តពោធិ៍សាត់ ។
សមត្ថកិច្ច បញ្ជាក់ថា គ្រោះថ្នាក់ចរាចរណ៍នេះ បណ្ដាលមកពីបើកបរក្នុងល្បឿនលឿន មិនប្រកាន់ស្ដាំ គួបផ្សំផ្លូវកោង និងដីហុយពីរថយន្ដខាងមុខផង (ពិបាកមើលផ្លូវ) ។
សាកសពទាំង ៣នាក់ បានប្រគល់ជូនសាច់ញាតិយកទៅធ្វើបុណ្យតាមប្រពៃណី ហើយកូនស្រី អាយុ ៣ឆ្នាំ ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត ។ ចំណែកវត្ថុតាង និងអ្នកបើកបររថយន្ដ បានធ្វើការឃាត់ខ្លួនបញ្ជូនទៅស្នងការដ្ឋាននគរបាលខេត្ត ដើម្បីដោះស្រាយតាមនីតិវិធីច្បាប់ ។
សូមបញ្ជាក់ថា នៅព្រឹកថ្ងៃទី៨ ខែមករា ឆ្នាំ២០២៥ នេះ លោក ខូយ រីដា អភិបាល នៃគណៈអភិបាលខេត្តពោធិ៍សាត់ បាននាំយកថវិកាចំនួន ១០លានរៀល និងអង្ករ ២០០គីឡូក្រាម ទៅចូលរួមបុណ្យសពជនរងគ្រោះទាំង ៣នាក់ នៅឯគេហដ្ឋាននៃសព ស្ថិតនៅភូមិត្រាំសេះ ឃុំបឹងបត់កណ្ដោល ស្រុកបាកាន ខេត្តពោធិ៍សាត់ ។ ដោយលោកអភិបាលខេត្តបានសន្យាថា នឹងជួយផ្គត់ផ្គង់កូនស្រីច្បង អាយុ ១២ឆ្នាំ ឱ្យបានរៀនសូត្របន្តផងដែរ ៕
