ភ្នំពេញ៖ យោងតាមរបាយការណ៍ អគ្គស្នងការនគរបាលជាតិ បានឱ្យដឹងថា កាលពីថ្ងៃទី៣ ខែធ្នូ ឆ្នាំ២០២៤ ជនជាតិថៃមួយក្រុមត្រូវបានចាប់ខ្លួនពីបទជួញដូរគ្រឿងញៀនខុសច្បាប់ ដោយរឹបអូសបានថ្នាំញៀនមេតំហ្វេតាមីនជាង ១ម៉ឺនគ្រាប់។
របាយការណ៍បានបញ្ជាក់ថា ជនសង្ស័យទាំង១០នាក់ មាន៦នាក់ជាបុរស និងស្រី៤នាក់ អាយុចន្លោះពី២៥ឆ្នាំ ដល់៤១ឆ្នាំ ត្រូវបានចាប់ខ្លួនកាលពីយប់ថ្ងៃទី៣០ ខែវិច្ឆិកា អំឡុងពេលដើរល្បាតក្នុងភូមិអូរជ្រៅ ក្នុងក្រុងប៉ោយប៉ែត ខេត្តបន្ទាយមានជ័យ។ ទន្ទឹមនេះរកឃេីញថ្នាំគ្រាប់មេតំហ្វេតាមីនសរុបចំនួន ១០,៧៤៨គ្រាប់ ត្រូវបានរឹបអូសពីពួកគេក្នុងអំឡុងពេលឆ្មក់ចូល រួមនឹងជញ្ជីងចំនួន៣ផងដែរ។
លោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត បានឲ្យដឹងថា ជនសង្ស័យត្រូវបានចោទប្រកាន់ពីបទកាន់កាប់ ជួញដូរ និងប្រើប្រាស់គ្រឿងញៀនខុសច្បាប់។
សូមបញ្ជាក់ថា កម្ពុជាបានឃាត់ខ្លួនជនសង្ស័យពាក់ព័ន្ធគ្រឿងញៀនចំនួន ២៣,៦០១នាក់ ក្នុងនោះមានជនបរទេសចំនួន ៨១៦នាក់ ក្នុងអំឡុងខែមករា ដល់ខែវិច្ឆិកា ឆ្នាំ២០២៤ ដោយរឹបអូសបានថ្នាំញៀនសរុបចំនួន ១៣,៣តោន។ នេះបេីយោងតាមរបាយការណ៍នាយកដ្ឋានប្រឆាំងគ្រឿងញៀន។
ថ្នាំញៀនដែលរឹបអូសបានភាគច្រើនមាន ខេតាមីន មេតំហ្វេតាមីន គ្រីស្តាល់ មេតំហ្វេតាមីន ហេរ៉ូអ៊ីន អេស៊ីស្តាស៊ី និងកូកាអ៊ីន៕
